T.Claude 
Leta ya Repubulika ya Demokarasi ya Congo yabujije ibitangazamakuru byo muri icyo gihugu gutangaza amakuru ku bikorwa bya Joseph Kabila wahoze ari Perezida no gukoresha ibiganiro abo mu ishyaka rye.
Ibi bibaye nyuma yuko Kabila asubiye muri DRC mu kwezi gushize, mu gihe ubushyamirane bwiyongereye hagati ye na leta itegekwa n’uwamusimbuye, Perezida Félix Tshisekedi.
Abategetsi barimo guharanira ko Kabila aburanishwa ashinjwa ubugambanyi no kugirana imikoranire n’inyeshyamba za M23 zimaze igihe zirwanya igisirikare cya DRC – ibi mbere akaba yarabihakanye.
Umukuru w’ikigo cy’ubugenzuzi bw’ibitangazamakuru muri DRC, Christian Bosembe, yavuze ko kubirengaho bishobora gutuma igitangazamakuru gihagarikwa.
Umuvugizi wa M23 yasubije kuri iryo tangazo ry’urwego rwa DRC rw’ubugenzuzi bw’ibitangazamakuru rwitwa CSAC (Conseil Supérieur de l’Audiovisuel et de la Communication), avuga ko ibitangazamakuru byo mu bice M23 igenzura bitazabikurikiza
Nta cyo Kabila yahise atangaza ariko Ferdinand Kambere, umunyamabanga w’ishyaka rye, yamaganye icyo cyemezo, atangaza ku rubuga nkoranyambaga X ko “gihutiyeho”.
Mu cyumweru gishize, Kabila yabonetse mu mujyi wa Goma, umurwa mukuru w’intara ya Kivu ya Ruguru mu burasirazuba bw’igihugu, ugenzurwa na M23.
Yanenze bikomeye ubutegetsi bwa DRC nyuma yuko sena y’icyo gihugu itoye ikamwambura ubudahangarwa kubera gushinjwa gukorana n’umutwe wa M23.
U Rwanda, umuturanyi wa DRC, rushinjwa gufasha uwo mutwe w’inyeshyamba ariko rurabihakana.
Kabila, utararegwa icyaha na kimwe, mu kwezi gushize yibasiye bikomeye ubutegetsi bwa DRC, avuga ko ari “ubutegetsi bw’igitugu”.
Icyo gihe, umuvugizi wa leta ya DRC yamaganye uko kunenga ubutegetsi kwa Kabila, avuga ko “nta gitekerezo na busa afite cyo gutanga”.
Jean-Claude Katende, Umunye-Congo w’impirimbanyi akaba na perezida w’ishyirahamwe ry’Afurika ryo kurengera uburenganzira bwa muntu, yavuze ko icyemezo cya CSAC ari “ugukoresha nabi ububasha”, nkuko ibitangazamakuru byo muri icyo gihugu byabitangaje.
Hagati aho, umusesenguzi kuri politike w’Umunye-Congo Ambroise Mamba, yatangaje ubutumwa ku rubuga X avuga ko icyo cyemezo gishobora kugira ingaruka zitari zitezwe n’abagifashe kuko gishobora gutuma ahubwo abantu bagira amatsiko yo kumenya ingendo za Kabila n’ibikorwa bye.
Kuva Kabila yasubira muri DRC nyuma y’imyaka ibiri yari amaze yarahunze ku bushake, ishyaka rye rikomeje gutangaza ibikorwa bye ku mbuga za interineti, birimo nko gusura imiryango itegamiye kuri leta (imiryango ya ‘société civile’) n’abahagarariye amadini i Goma.
