T.Claude 
Perezida w’ishyirahamwe ry’umupira w’amaguru muri Cameroun (Fécafoot) yarezwe n’umwe mu bagize komite nyobozi y’iri shyirahamwe ruswa no kunyereza 455,000 euros yari agenewe iryo shyirahamwe.
Guibai Gatama, umwe mu bagize inama y’ubutegetsi ya Fédération Camerounaise de Football (Fécafoot) yasohoye itangazo rishinja Samuel Éto’o ko yakiriye kuri konti ye bwite mu buryo budasobanutse ariya mafaranga, bigendanye n’umukino wa gicuti wari ugiye guhuza ikipe y’igihugu Les Lions Indomptables hamwe n’ikipe y’igihugu y’Uburusiya mu 2023.
Samuel Eto’o Fils n’abantu babiri bareganwa na we ntacyo baratangaza kuri ibi birego.
Mu itangazo yasohoye, risubirwamo n’ibinyamakuru by’imikino muri Cameroun, Gatama yashinje Eto’o n’abandi bantu babiri “ruswa, kunyereza imari, n’ubufatanyacyaha mu kunyereza imari”, ibyo avuga ko yaboneye ibimenyetso mu nyandiko zatangajwe muri uku kwezi, kandi ko yiteguye gutanga amakuru arambuye muri komite ishinzwe imyitwarire muri Fécafoot yabaregeye.
Eto’o ubu w’imyaka 44, yabaye icyamamare ubwo yari rutahizamu w’ikipe ya Barcelona yo muri Espagne na Chelsea yo mu Bwongereza, ndetse n’ikipe y’igihugu cye ya Cameroun.
RFI ivuga ko yabonye amakuru ko ayo mafaranga yaciye kuri konti bwite ya Samuel Eto’o byamejwe “n’akanama kadasanzwe” kubera ko Uburusiya buri mu bihano mpuzamahanga by’imari, ko ayo mafaranga nyuma yashyizwe kuri konti ya Fécafoot.
Gatama avuga ko ishyirahamwe ry’umupira w’amaguru muri Cameroun ari umurage rusange bityo imari irigenewe itagomba guca kuri konti y’umuntu ku giti cye “nubwo yaba ari iya perezida waryo”.
Nyuma yo guhagarika gukina nk’uwabigize umwuga, Eto’o watwaye igihembo cy’umukinnyi wahize abandi muri Afurika ishuro enye, mu 2021 yatorewe kuba umukuru w’ishyirahamwe ry’umupira w’amaguru mu gihugu cye.
Eto’o yagiye agarukwaho mu mpagarara zabaye muri iryo shyirahamwe, umwaka ushize yashyamiranye na minisiteri y’imikino yari yashyizeho umutoza w’ikipe y’igihugu Eto’o avuga ko ari ukwivanga mu mupira kwa leta.
Mu mpera z’umwaka ushize FIFA yahagaritse Samuel Eto’o, ivuga ko mu gihe cy’amezi atandatu abujijwe kwitabira imikino mpuzamahanga yose y’amakipe y’igihugu ya Cameroun kubera guhonyanga ingingo z’amategeko ngengamyitwarire ku bibuga ya FIFA .
Hari nyuma yo kugaragaza umujinya no kwitwara nabi nyuma y’umukino w’igikombe cy’isi cy’abatarengeje imyaka 20 aho ikipe y’abagore ya Cameroun yatsinzwe na Brazil muri Nzeri(9) 2024 i Bogota muri Colombia.
Mu kwezi kwa Werurwe (3) uyu mwaka, ni bwo Eto’o yongeye kugaruka ku bibuga nyuma y’icyo gihano cya FIFA.
Hagati mu mwaka ushize impuzamashyirahamwe y’umupira w’amaguru muri Afurika, CAF, yaciye Samuel Eto’o amande ya 200,000$ imushinja ko yasinye amasezerano yo kuba intumwa (ambassador/ambassadeur) yakompanyi ikora ubucuruzi bwo gutega ku mikino (Betting), ibinyuranyije n’amabwiriza ngengamyitwarire ya CAF.
Mu 2023, ishyirahamwe ry’amakipe y’umupira w’amaguru atarabigize umwuga muri Cameroun ryasabye Eto’o kwegura ku mwanya we “kubera amakosa akomeye” yakoze nk’umukuru wa Fécafoot.
Eto’o kenshi yagiye ahakana amakosa yashinjwe avuga ko ari umugambi wo kumwibasira kubera impinduka yazanye mu kuyobora umupira w’amaguru muri Cameroun avuga ko wari waramunzwe na ruswa no kuyoborwa nabi.
